الفصل الثالث

" لكنك لن تراها, ستحرص على ألا تراها"

19 مارس 2012

• مش هينفع نقعد برة, لو عندك استعداد تدخل لازم تكون مدرك إنك مش هتاخد كل الاجابات دلوقتى, وفى اجابات هسيبك انت تعرفها بنفسك وإن اللى هيدور ما بيننا وكل اللى هتعرفه لو حد غيرك عرفه إنت بتعرضه للخطر, موافق؟
• .....

دخلا سوياً للمرة الثانية ولكن هذه المرة كلاهما فى كامل وعيه, دقق يونس فى تفاصيل المنزل, بعض الآيات القرآنية معلقة على حوائط صالة صغيرة, أثاث رخيص يحاول جاهداً أن يظهر حس الرفاهية بكنب منتفخ, بلاط مغطى بألوان عشوائية, تليفزيون متواضع الحجم, أمام الصالة على امتداد باب المنزل طرقة صغيرة يتفرع منها حمام فى الواجهة, مطبخ على اليمين وغرفة نوم واحدة على اليسار, نفس الغرفة التى استيقظ فيها يونس أول مرة دخل فيها هذا المنزل.

جلس الاثنان على يمين الصالة يتوسطهما طاول خشبية فى صمت تام تجاوز الدقيقتان, حاول يونس أن يبدأ بالكلام ليكسر هذا الحاجز الغريب من الصمت ولكنه تردد كثيراً حتى...

·       إنت اللى رجعتنى البيت؟

·       لأ

صمت يونس منتظراً منه تكملة اجابته, لكن لا شئ. بعد مرور دقيقة أخرى تركه الشيخ عيسى وذهب إلى غرفته واحضر صندوق حجرى منحوت عليه بعض الرموز.

·       ليك عزيز؟

·       مفيش بنى آدم ملوش عزيز

·       لأ فيه, لما تبقى زيى مش هيفضلك عزيز

·       أنا هبقى زيك ليه

·       إنت مش جاهز لإجابة السؤال ده

·       جربنى

·       لأ

·       إنت ضربتنى ليه؟

·       ماكنش المقصود إنت

·       إنت مش شايف دماغى ورمة ازاى؟

·       لأ

لوح يونس بيديه أمام الشيخ عيسى, لا شئ.

·       أنا أسف

·       كدة أحسنلك وأحسنلى

لم يستمر حديثهما أكثر من ذلك, انتظر تفسيراً لأسئلة كثيرة تدور بعقله لكنه فضل أن ينسحب بعد أن وضع نفسه فى موقف محرج.

·       أنا مضطر أستأذن دلوقتى

·       خد الصندوق ده معاك, لو ليك عزيز بتخاف عليه, اديله الأمانة اللى فالصندوق

·       الصندوق ده فى ايه

·       متفتحهوش هنا, احترم حرمة المكان. اتفضل

وجه إليه بسبابته ناحية باب المنزل ليخرج, أخذ الصندوق الحجرى ورحل متعجباً من تعجرف العجوز. أثناء توجهه لباب المدافن تذكر شئ هام, هو لم يفقد وعيه كالمرة السابقة, لم يجد اجابات لتساؤله.

توجه لجامعته وحضر محاضرة واحدة متحملاً عرق أكثر من مئتين طالب رغماً عن أنفه. قبل رحيله قابل زميله عمر بادئاً زميله الحديث.

·       مش نستحمى آيونس بقى ولا إيه؟!

·       يا معفن أنا بستحمى مرتين فاليوم, روح شوف فلاحين الدفعة اللى بيقعدوا بالأسبوع من غير حمى ويجوا يقرفونا فالمحاضرات

·       خدت بالك لما حد فسى

·       قصدك على أنهى مرة؟ قبل ما إنت تفسى ولا بعدها؟

·       طب مش تستر أخوك

·       أكبر للدفعة واستأذن قبلها المرة الجاية

·       يبنى دى دفعة بنت كلب عايزة الحرق عشان تطهر, ده لو ماسورة مجارى ضربت فيهم ينضفوا

·       الله يقرفك مش طالبة نتانة علمسى, أنا مروح

·       خد يا عم أقولك

تركه يونس ورحل, لم يتحمل الاستمرار فى هذا الحديث المقزز. بدأ رحلته الطويلة الروتينية المملة للعودة لمنزله.

أمه لم تعد بعد للمنزل, توجه لغرفته حيث ترك متعلقاته على أحد الكراسى. قرر أن ينال قسط من الراحة لساعتين حتى عودة أمه, توجه لسريره ونام.

·       خاف عليها من نفسك هى ملهاش ذنب, سعاد

ظلام..

يحاول أن يتحرك, يصرخ ولكنه فشل, قرر أن يصبر ويركز كل طاقته ليستيقظ, أستيقظ وصرخ..

·       شيخ عيسى!

·       طيب أحلم ببنت حلوة ترفع راسى بيها, أحلم حتى بأمك

·       ماما, الساعة كام دلوقتى؟

·       الساعة دلوقتى بقت اتناشر ونص, اديك قلبت يومك مش عارفة هتنام الصبح ولا امتة كدة

·       هطبق عشان اظبط يومى, اتعشيتى ولا لسة؟

·       مستنية جنابك تصحى

·       تمام, حطى الأكل وأنا جاى

·       لوسمحتى, اسمها لوسمحتى

·       لوسمحتى رشوان حطى الأكل وأنا جاى

·       يونس حطى الأكل حاضر

تركته لتحضر الطعام, تذكر ما رأه فى حلمه, كان ذلك الشيخ عيسى. تذكر الأمانة, ربط أخر كلام دار بينهما. تناول حقيبته وسحب الصندوق الحجرى ليفتحه.

قلادة تبدو قديمة بعض الشئ ويبدو عليها شئ من الفخامة ومنحوت عليها...

"السلام ورحمة العزيز, السلام لكل عزيز"

سمع صوت المنبه يرن من هاتفه فوجد تنبيه أن عيد ميلاد أمه غداً, نظراً لحالته المادية المتعثرة فوجد أن تلك القلادة ظهرت فى وقتها المناسب, توجه لوالدته وهى تهم بغرف الطعام وفاجأها بلف القلادة حول عنقها.

سعادتها كانت لا توصف تلك الليلة, سألته من أين وفر ثمنها فرد بكل سذاجة مقنعة أنه كان يوفر مبلغ كبير من المال كى يشترى لها هدية قيمة فى عيد ميلادها, صدقت ولكنه لم يدرك لعبة القدر التى أنقذتها من عذاب كاد أن يجعله يخسرها للأبد.

قضى الليلة معافراً ألا ينام كى يتمكن من ضبط ساعته البيولوجية. صباح ثانى يوم كان عنده محاضرة. قبل أن ينزل رن هاتفه, مكالمة من عمر..

·       صدق إنت عيل مرزق

·        خير؟

·       النهاردة المحاضرة اللى فاتت دكتور عبد الحميد فوسط محاضرته سمعنا صوت حاجة بتنفجر, شوية ولقنالك ماية بتتسرب من تحت الباب, افتكرنا حد بيسيق ولا حاجة

·       وبعدين؟

·       بنبص يا معلم ألاقيلك شلال خرة ضرب فالمدرج خلى ربع الدفعة يجيبوا اللى فبطنهم علأرض

·       ظهر الحق وزهق الباطل

·       إن الباطل كان زاهوقاً, نجيت يابن المحظوظة, سلام دلوقتى عشان هروح اتطهر من النجاسة اللى شفتها النهاردة

·       كل حمة وإنت طيب

كان نهاراً رتيباً قرر قضاءه فى منزله, استيقظت أمه وتوجهت إلى عملها فى عجالة. اشتدت النوة هذا النهار فقرر البقاء بمنزله مستمتعاً بصوت الرياح حول منزله حتى...

"برشششششش"

اصطدمت الرياح بزجاج حجرته حتى تهشم فأقتحم كم هائل من الأتربة داخل حجرته حتى أختنق. أغلقت الرياح باب غرفته وملأت الأتربة أنحاء غرفته حتى انعدمت قدرته على الرؤية. أخذ يتحرك بشكل عشوائى محاولاً الوصول لباب غرفته لكن لا شئ.

شعر بجسم يصطدم به, ظن أنه النجفة المعلقة بغرفته لأنه شعر بزجاج يخترق سطح جلده ثم حمل يدقه أرضاً, ظلام.

·       بحلم

أدرك ذلك بمجرد أن فتح عينيه. حلم, هو يدرك ذلك جيداً فهو اعتاد على قدرته فى أحلامه أن يميز أنه نائم, ظاهرة ضيقة الانتشار.

بحر صافى لدرجة أنه يرى الأسماك من مكانه على الشاطئ, نسمات الهواء تتخلل قميصه الحريرى الأبيض, صوت الأمواجة تضرب الشاطئ, لا أحد. أقترب من الماء وتقدم خطوات للأمام ليتمتع باحتكاك الماء بساقيه, يداعب الرمال بأصابع قدمه متجاهلاً الأسماك الزينة الصغيرة التى تقرصه. استمر فالسير حتى وصل الماء إلى أسفل عنقه, حتى ظهرت من بعيد تبتسم له. كأى ذكر فى أى أحتلام قررأن ينتهز هذه الفرصة, بدأ يسبح كى يصل إليها حتى أختفى قاع البحر وبدأ يشعر بثقل الماء حتى أجهدت أكتافه وأذرعه. أختفت, بدأ يتوتر, لن يستطيع أن يعود فحاول أن يريح جسده قليلأ فثبت فى مكانه وأغرق نفسه قليلاً حتى تستريح عضلاته.

فى فستان أبيض قصير تحت سطح الماء تتجه ناحيته ويحاط بها فراشات وردية تسبح حولها, جذبته من ياقة قميصة. أغلق عينيه وأعتصر شفتيها المكتظتين فى أكثر قبلة أدركها فى أحلامه, كانت واقعية جداً أشبع فيها عشرين سنة من العزوبية.

شديدة البياض, عينين شديدتين الزرقة, شعرها صارخ السواد, لم يستطع أن يصف جسدها أكثر من أنه مثالى فهو لم يعى شكلها بدقة كاملة فى حلمه. احتضنته وجذبته للقاع, لم يقاوم واستسلم لرغباته حتى بدأ ينتشى من نقصان الأكسجين فى رئتيه أو ربما هو انتشى من رائحة جلدها, نعومته, حلم أم واقع, بدأ يختلط عليه الأمر من التفاصيل.

فتح عينيه فوجده يطفو خلفها ينظر إليه وهو منكس الرأس, الشيخ عيسى, تجاهله وظن أن ذلك نتيجه هلاوس نقص الأكسجين من رئتيه حتى..

·       مش هتطلع من هنا, مكانك مع أمك هنا.

انتفض ودفعها بعيداً. على الرغم من عدم وضوح صوتها تحت الماء إلا أنه ميزه, نفس الصوت الأنثوى الذى سمعه أول مرة فى بيت الشيخ عيسى. ابتسمت وبدأ يرى ملامح وجهها بدقة, بقع سوداء تغطى وجنتيها, ابتسامتها كشفت عن أنيابها, قرنين يبرزان من بين شعرها وذيل مغطى بقشور حادة يعتصر صدره, نظر لها, رأى نفسه, نور ساطع.

لم يستيقظ بعد, لا يتحرك ولا يتنفس, النور يحرق عينيه, يصرخ ولكن صوته مكتوم. بدأ يعرق بغزارة وينزف من صدره, يرتعش. سمع صوت اقتحام بغرفته, استيقظ.

·       ابنى!

كان مستلقى على الأرض وسط كومة رملية, فانلته بها بعض الثقوب الصغيرة كمصفاة تحتها خدوش سطحية على جلده تاركة بقع طفيفة من الدماء على فانلته. ساعدته أمه على النهوض واستند عليها. توجها إلى غرفتها ليستلقى على سريرها وبدأت تداوى جراحه وبدأت تقرأ له القرآن واضعة يدها على صدره.

هدأت الرياح خارج المنزل, جهزت له  وجبة دسمة وتركته يأكل وتوجهت لغرفته لتنظفها. شعرت باهتزاز بسيط بالنجفة, شكت بأنه زلزال ولكن الاهتزاز توقف.

سقطت عليها النجفة, صرخت..

·       السلام ورحمة العزيز, السلام لكل عزيز

يتبع
_________
رسم:

• إسراء زكريا
• على حسنى صيام

مراجعة:

• شريف كوستا
• نورا القاضى
• إسراء زكريا
• على حسنى صيام

الفصل الثانى

"….يهم العجوز بضرب يونس بعصاته على رأسه ولكن قبل أن تصل عصاته, ظلام"

14 مارس 1992

سعاد رشوان, فى العقد الثالث من عمرها, أب, أبنة وأخ فى عامه الأخير فى كلية الطب, رفضت الاهتمام كصديقاتها من سنها بالزواج منذ رحيل أمها وهى فى الحادية عشر من عمرها. تمحورت حياتها بالأنشغال بأبيها بعد سفر أخيها للدراسة.

فى وحدتها كانت تضع طرحة العروسة, تجدها بجوار الغسالة أو فى المطبخ واضعة الطرحة البيضاء, مشهد مريب عندما تجدها داخل الحمام بسيراميكه الأخضر واضعة الطرحة البيضاء جالسة أمام الطشط البلاستيك تدندن أغانى الزفة والأفراح لتنسى وحدتها, لكنك لن تراها, ستحرص على ألا تراها.

تعمل ممرضة بأحد المستشفيات الخاصة, عملية, متفوقة, مختلفة عن باقى الممرضات, تعرف دائماً حقوقها وواجباتها.

لم تتعرض للمعاملات السمجة من الأطباء حديثى التخرج لأنها نجحت فى فرض شخصيتها العملية عليهم, هم يخشونها.

تمنت أن تصبح طبيبة ولكن شبح الثانوية العامة لم يسمح لها بالوصول لهذا الحلم. بعد عملها كممرضة أصرت على المشاركة فى مصروف البيت لتثبت جدارتها ونجاحها لأبيها.

فى أحد الليالى كانت اخر نوات رياح الخماسين لتعلن عن فصل الربيع, الرؤية معدومة مصحوبة بموجة حارة لا تحتمل. كل الأبواب والمنافذ مغلقة لتجنب الغرق بموجة ترابية قد تضر بصحة المرضى. نجح معظم الأطباء بتجنب الحضور ذلك اليوم للنجاة من تلك النوة بالإضافة لقلة الحالات التى تصل للمستشفى فى الأيام الأخيرة بسبب عمليات الصيانة فى معظم الأقسام.

لم تستطع مغادرة المستشفى بسبب المناخ, حساسية الصدر التى لازمتها منذ الطفولة ألزمتها البقاء فى فى المستشفى حتى ساعات متأخرة, قضت الليلة تتجول فى المستشفى حتى تسمرت أمام عنبر حضانات الأطفال, لم تكن حزينة, لم تحقد, نعم تتمنى, لكنها كانت تقضى وقتها فى العنبر مستمتعة فقط بمشاهدة الأطفال, تصلى لتصبر وليرزقها ربها بظروفٍ أفضل تسمح لها بتكوين الأسرة التى تمنتها دائماً. عادت لمكتبها لتنهى بعض الأعمال المكتبية الروتينية وتنظم مرتبها واحتياجات البيت.

قضت بضعة ساعات تنهى ما بدأته حتى سمعت صوت أتربة تحتك ببلاط المستشفى, جسم غريب يقترب منها, هذا كأقرب تشبيه حتى ظهرت أمامها طفلة فى الثالثة عشر من عمرها كأقرب تقدير, نحيلة الجسد ببطن منتفخ تزحف على أرض المستشفى.

وقفت سعاد تحاول أن تستوعب الموقف حتى تبدأ فى المساعدة.

تحاملت الطفلة على نفسها حتى وقفت ونظرت نظرة حادة لسعاد, عينين زرقاوتين صارختين, وجه باهت متسخ, نحيف تبرز منه عظام وجنتيها. بركت جثة هامدة أمام مكتب سعاد, همت لتساعدها, وضعت يدها على عنقها, تقرر إعلان حالة الوفاة ولكن..

دماء تسيل من تحت رداء الطفلة بغزارة حتى برز جسم غريب يتحرك من بين فخذى الطفلة, طفل..

كى تنقذ حياته لم تنتظر اخطار احد الأطباء, قامت بقطع الحبل السرى, حملت الصبى, اتجهت به للحضانات, لا يوجد مكان للطفل, عادت لتتفقد الأم, أو الطفلة, لكنها اختفت.

كقرار طبيعى ستبدأ اجراءاتها الروتينية وتتصل بالشرطة وتخطر المدير بالواقعة ثم سيحال الطفل لدار أيتام على سبيل المثال, لكن بدأت الفكرة تلمع فى ذهنها.

هذا هو ما تمنته دائماً, هى تحتاج أن تعوض احتياجها الدائم لإحساس الأمومة, هذا بخلاف أنها تعلم المصير المقدر الحتمى لهذا الطفل من سوء معاملة وتشريد وقطع أرجل وثقب أعين.... حتى ينتهى به الحال شحات فى أحد محطات القطار.

تحركت بتلقائية كأنها خطة معدة مسبقاً ونفذت ألاف المرات, لفت الطفل فى ملائة, الساعة قاربت للسابعة صباحاً, انتظرت وصول من يحل محلها, هرولت لمنزلها بالطفل, أغلقت باب غرفتها, أراحت ظهرها عليه وأنزلقت حتى الأرض وعلى وجهها ابتسامة عارمة, هى تعلم كم التحديات التى تنتظرها, تساؤلات كل من حولها, الجيران, الأصدقاء, الأقارب,.... أبيها؟!

لم تقو على استمرار التساؤلات فى ذهنها حتى نامت فى مكانها.

• أنا مش قادرة أفتح عينى, أنا هموت؟ أصحى, أصحى, أصحى, طب أجرب اتحرك, بابـ...

لم تستطع حتى أن تحرك شفتيها أو تخرج أى أصوات

• أعوذ بالله من الشيطان الرجيم, الولد فين؟؟ مش باينله صوت, هو كان حلم ولا ايه؟؟

لم تنم جيداً, استيقظت عصر نفس اليوم. اتجهت للمطبخ لتتفقد أبيها, ولكنه لم يكن حلماً..

• سوسو, كويس إنك صحيتى يا حبيبتى, خدى شيلى الولد عشان بهدلنى

بدون أن تنطق كلمة, توجهت لتحمل الطفل, كان أبيها قد نظفه وغسل جسمه جيداً, ولكنه لم يسأل, لم يسأل أى سؤال عن الطفل.

كأنه يخشى الإجابة..

داخل عقل سعاد الكثير من التساؤلات, لا تعرف تبداً بأيهم..

تعجبت من تقبل أبيها وجود الطفل فى البيت على الرغم من أنه لم يطرح أى أسئلة.

صباح اليوم التالى بدأت لللإعداد لأوراق الطفل الحكومية واستغلت كافة علاقاتها من الأصدقاء القدامى وكل من أسددته معروفاً أو جميلاً فى التأمين الصحى أو كافة المصالح الحكومية, تبنته, هو ابنها الآن طبقاً للأوراق الرسمية.

ولكنه لم يسأل...

• طلعنا من هنا حالاً...

حاول يونس جاهداً أن يستيقظ ومع محاولاته يزداد حمل على صدره, صبر وصمد حتى استيقظ, اخذ الأمر نحو نصف دقيقة حتى يتأكد أنه فى منزله... حلم

• ماما!!
• يونس, أخيراً صحيت, أنا حاولت اصحيك أربع مرات وقعدت تخرف فسيبتك تكمل نوم, أنا نازلة المستشفى دلوقتى, عندك الغدى فالفرن, هتتغدى لوحدك عشان متأخرة.
• مش قادر اتغدى دلوقتى, سيبيلى دوا صداع ولا أى حاجة على الكومودينو عشان مصدع
• إيه اللى فقورتك ده؟
• فى إيه؟
• فى كدمه فقورتك, إنت كنت بتتخانق ولا ايه؟

لم يكن حلماً, بدأ يتذكر المدافن, الرجل العجوز والصوت الأنثوى مجهول المنصدر.

• لأ وأنا نايم وقعت من على السرير بس كملت نوم من غير محس بوجع, هتصرف دلوقتى انزلى المستشفى إنت بس.
• إنت كذاب يا ولد, هو أنا أول مرة أشوف كدمات.
• ماشى أنا كذاب, متشكر.
• أنا نازلة الشغل دلوقتى ولما ارجع هتقولى ايه حكاية اللى فوشك ده ومين عمل فيك كدة.
• هو جدو كان بيدلعك بيقولك ايه؟
• بتغير الموضوع, لما ارجع لينا قعدة طويلة, الدوا عندك اهه.

بمجرد أن خرجت حتى بدأ الألم يعتصر رأسه, تمالك نفسه حتى خرجت حتى لا يشعرها بأى قلق, تناول الدواء من على الكومودينو. لم تمر خمس دقائق حتى بدأ عقله يستريح. توجه لدولاب والدته ليتفحص صور جده القديمة حتى وجد صورة تعود لأوائل التسعينات. فوجئ من دقة ما شاهده فى حلمه, أو ما يعتبره حلم, هو لم يستقر عقله بعد على ما كان واقع وما كان حلم بين الأحداث التى مر بها خلال الثمانية والأربعين ساعة السابقة.

كانت الصورة له مع جده, كل التفاصيل التى شاهدها فى حلمه لشكل جده فى تلك الفترة تطابقت مع حلمه.

ارتبك من الصورة, قرر أن يعود لغرفته وينتظر عودتها ليحكى لها ما حدث, أو يظن أنه حدث.

• لحظة, أنا جيت البيت ازاى؟! ايه اللى حصل فالجنازة

جلب هاتقه ليتصل بزميله الذى حضر جنازة والده

• ألو, ايه يا ريس عامل ايه النهاردة؟
• باشا! فينك وفين أيامك, مفيش مرة تفوت علينا, شكلك بقيت من العيال بتوع Qnet وجاى تقلبنا فمصلحة
• يبنى منا كنت لسة مـ...., احنا اخر مرة اتقابلنا امتى؟
• يجى بتاع سنتين كـ..
• طب معلش سلام يا معلم دلوقتى خمسة كدة وهكلمك.
• .....

https://soundcloud.com/aly-talibab/aly-talibab-ft-hesham-tag-the

شفت النور ف الضلمة قلت أجريله يمكن الحق .. لاقيت عيون ف الضلمة عليا تبحلق 

فـأتسندت على احلامى قدرت اكمل لآخر الطريق .. احساس بخوف بيبعد وايمان بيقوى بيه 

لو كان طريقك حق .. يبقى الجحيم لآى حد

على طالباب

لم يكمل مكالمته, اختلطت عليه كل الأحداث, بين الواقع والأحلام.

خارج شرفة غرفته طافت تشاهده, كعادتها, وسط نوة تراب تعلن عن فصل الربيع, نوة رياح الخماسين.

قرر أن يعود من حيث بدأ كل شئ, مدافن المنارة. نزل من منزله فى الواقع فى الإبراهيمية وسلك طريقه وسط جحافل البشر فى شارع لاجيتيه حتى وصل لشارع أبو قير ونجى من هذا التكدس النسائى.

وصل إلى المدافن بعد أن تعبأ فمه بأكواب من الأتربة والرمال حتى جف ريقه, لا يعرف إلى أين يتجه, لا يعرف عن من يسأل.

شاهده حارس المدافن ولاحظ حيرته.

• اؤمر يا بيه, أى خدمة؟
• سلامو عليكوا, أنا بدور على حد, هو فى حد ساكن هنا.
• مفيش غير الشيخ عيسى الحانوتى, بس هو مش موجود دلوقتى, أؤمر تحب نوصله خبر بحاجة؟
• لأ متشكر, هو هيغيب؟
• معنديش فكرة واللهى

قام الرجل بفرك يديه كإشارة بأنه مستعد أن يتلو المزيد إن قدم له يونس نوع من عربون محبة. اخرج يونس من جيبه ورقة بخمسة جنيهات.

• لا يا بيه عيب الكلام ده, شيل فلوسك فجيبك.
• صل علنبى فقلبك متتكسفش, اعتبره عربون محبة
• طب اتفضل قعد اشرب حاجة
• متشكر لسة متغدى
• شوف يا بيه, إنت ابن حلال, هو زمانه فالسكة دلوقتى تلاقيه راح بس يشترى حاجات من السوق, خد يمينك ده, امشى للاخر وخد شمالك هتلاقى بيته لو حابب تستناه هناك.
• طيب, تشكر آريس, سلامو عليكوا.
• عكلسلام ورحمة الله وبركاته.

سلك الطريق كما وصف له حتى وصل وهناك وجد بيت صغير أمامه استراحة تغطيها تندة, منضدة وكرسيين بلاستيك وأثار مياه تغطى الأرض أمام المنزل لترطيب المناخ قليلاً وصوت الشيخ عبد الباسط يغرد فى أركان الاستراحة قادم من راديو قديم يقاوم صوته الأتربة المعبأة بداخله, ولكنه الشيخ عبد الباسط, على الرغم من ضعف صوت الراديو إلا إنه لم يقلل من عذوبته والاسترخاء الذى أضافه للمكان.

https://soundcloud.com/mohcin-rgagna/o76hmxu49f9r

جلس على أحد الكرسيين وانتظر حتى وجده قادم من بعيد فتأكد حينها بأنه لم يكن يحلم. لم تبد على معالم وجه الثاتى أى علامات للارتياب, التوتر, الخوف أو حتى السعادة, كأنه كان ينتظر حضوره.

• مش هينفع نقعد برة, لو عندك استعداد تدخل لازم تكون مدرك إنك مش هتاخد كل الاجابات دلوقتى, وفى اجابات هسيبك انت تعرفها بنفسك وإن اللى هيدور ما بيننا وكل اللى هتعرفه لو حد غيرك عرفه إنت بتعرضه للخطر, موافق؟
• ......

"... ولكنه لم يسأل ..."

يتبع

الفصل الأول

إسكندرية, 14 مارس 2012

شارك يونس فى طابور طويل على الكورنيش منتظرأً أى مواصلة لتنقله إلى بيته بعد عناء طويل فى يوم جامعى ممل. أكتفى بخمسة عشر دقيقة من الانتظار حتى أخذ القرار بالعودة لمنزله على قدميه. أخذ منه الأمر ساعة ونصف حتى وصل منزله بعد أن أنهك أنفاسه وتورمت قدماه.

كعادته يدخل منزله يحيى أمه, ليس بالشكل الرتيب التقليدى, تربطهما علاقة صداقة  قوية لتعوض حرمانه من أخ أو أخت وحرمانها من زوج بعد أن هجرهما بعد مولده بعد أن سافر فى مطلع التسعينات كمعظم الشباب المكافح فى تلك الفترة فى بداية حياتهم بأن يهاجروا لأمريكا أو انتظار عقد عمل فى الخليج, المهم أنه ذهب ولم يعد وأرسل لأمه بالبريد ورقة طلاقها.

• لسة قافلة مع جدك دلوقتى
• عامل ايه؟
• تعبان شوية, من كلام خالك أنا خايفة إنه..
• صل علنبى آحاجة, عازاكل
• عازاكل, مربية حمار فالبيت, فى حاجة اسمها لو سمحتى
• عازاكل

توجهت إلى المطبخ وتتبعها

• إنت محسود على فكرة
• أنا مثير وأعرف ذلك
• كنت بتكلم مع جدك دلوقتى وبحكيله, زمان لما كنا صغيرين أنا وخواتى كان بيجى يقرالنا قرآن واحنا نايمين, لما كان حد بيتاوب وهو بيقراله قرآن كان بيقوله إنه محسود
• قلتلك مش بحب اهتم بالكلام ده
• يبنى الحسد مذكور فالقرآن
• أمى, أنا فاهم, لكن أنا مش كل ما يحصلى مصيبة هعلق ده على شماعة الحسد, صل علنبى وربك يستر
• طب خد طبقك

لم يهتم لإنه لا يحب أن يعلق ظروف حياته وفشله على شماعة الحسد, هو مؤمن به ولكن لا يعتمد عليه ليكون شماعته.
كان يومه طويل بما يكفى ليتغاضى عن رائحته القذرة وينام.
عاد ليفكر مرة أخرى فى كلام أمه... عادى يعنى طول ما إنت مؤمن بالله ومبتغضبهوش كبر دماغك.
ولكنه عاد ليفكر فى حجم الأخطاء التى ارتكبها فى حياته... جايز, قشطة قشطة كبر دماغك.
لم يحتاج وقت طويل لإطفاء نشاط عقله ولتخيلاته بأنه محسود أو أن غرفته مليئة بالشياطين أو خلافه, الخيالات التقليدية لأى طفل التى يستحى الكبار من الإعتراف بأنهم يخشونها, هم فعلاً يتخيلوها ولكنهم يحاولون بشكل ساذج إنكار ذلك، نام.

تذكر نفس الحالة التى تصيبه من حين لاخر...  اهدى, إنت عارف إنك محتاج تركز عشان تعرف تصحى نفسك, جن؟! شيطان؟!, أنا عارف إن مش من المنطقى إنى أصرخ زى أى طفل أهبل “آمااااامااااااه!!!” إنت اللى هتصحى نفسك وفى أسوء الظروف الخيالية لو كان فى حاجة وليعاذ بالله فإنت راجل البيت.. إنت اللى هتحميها

ربما هى وجهة نظر بائسة لإيقاظ نفسه, أو مقنعة ولكنه اعتاد على هذا المنطق بعد أن شاهد "Bram Stoker's Dracula" وكأى طفل يخال له من أى حركة أو صوت بسيط وهو نائم بأن هناك مسخ أو كل ما تحب أم تصفه من خيالات أصابتك كطفل صغير, المهم أنه أياً كان ما سيظهر, فهو من سيحمى أمه وليس العكس.

بدء يرى ألوان ترتعش وهو يقاوم حتى تمكن من الاستيقاظ، اطمئن, نام وتكرر نفس الموقف مرة أخرى.

اعتبره المهدى المنتظر, ولى من أولياء الله الصالحين, هو لا يكترث ولكنه عاش طول حياته يشك بأنه هناك شئ غير منطقى به, هو عنده بعض البارانويا, أياً كانت تفسيراتك أو تفسيراته لكن كليكما سيتفق بأنه هناك شئ غير منطقى ولكن كل هذا كفيل بأن يجعله يعيش طول حياته يشعر بأنه مطارد, بارانويا.

مرة أخرى استطاع أن يوقظ نفسه ولكنه ارهق هذه المرة وقرر ألا ينام حتى صباح اليوم التالى.
بدأ يشك بأن ذلك يشابه لأعراض خرافة الجاثوم ولكنه رجح بأن السبب هو الاجهاد, يومه كان طويل بما يكفى ليصيبه أكثر من ذلك.


سره مدفون فنفس كل إنسان, كأى إنسان, ليس اعجاب ببنت أو ادمان مخدر ولا العادة السرية, ربما هو متهم بخطيئة, هو ليس مثالى, أو ربما بغيرهم من الخطايا, لكن سره كان أكبر,على الأقل بالنسبة له.
الحقيقة التى لا يتحدث أحد عنها أو حتى شك بوجودها لا يذكرها لوجود احتمال اتهامه بالجنون.

أنا ازاى شايف كل الناس؟ يعنى أنا الكون اللى بيدور حواليا؟ مكنش هيبقى فى كون لو متخلقتش؟ أنا بصيرة الكون؟ أنا المختار؟ طب مختار لايه؟ أنا حاسس إن أنا الكاميرا اللى بتدور من خلالها كل الأحداث.
كلنا ولو فمرحلة من حياتنا نمر بأسئلة وجودية, كطور نمر به فى مرحلة النضوج, كمرحلة التشكك والتفكير فالالحاد, لو لم تمر بها فتأكد إن أولادك سيمروا بها, هو مر بها كلها,سيطر على بعضها والبقية تركها حتى يجد اجابة منطقية على كل اسئلته, هو منتظر مصيره,مؤمن أن اجابات اسئلته ستحدد مصير محتم ورحلة ستغير مستقبله, أو دور مهم فوسط أحداث عظيمة, لكن كان مسيطر على خياله..
ركز فالواقع, عادةً التقلبات المصيرية مش هتحصلك, إنت بعيد كل البعد عن ده
أهم من هذا كله أنه لم يرد أن يعيش لتكون حياته مجرد عبرة لغيره, حتى ولو عبرة حسنة لاخر من الممكن أن ينجح, هو يريد أن يكون هو الشخص الذى سينجح.



فتح اللابتوب, soundcloud, … "بيقرأ عليه سورة الفلق قول له يا شيخ سيد الشباب بيقول آمان آمان آمان اتداويلنا ها الولد من الجن و من كل الحــ…"
اعتاد يتخيل حياته بموسيقة تصويرة, عينيه بفلاتر وصباحه بـخبر وفاة
الساعة الثامنة صباحاً جاءه اتصال اعتاد عليه مؤخراً..
ألو, أيوة خير؟ لا حول ولا قوة إلا بالله, شد حيلك. هى الجنازة امتى؟ طيب, شد حيلك.

نزل ليأخد الثواب ويقضى الواجب, المتوفى والد صديق له, علاقتهما ليست قوية, ولكنه ثواب.
قريب, بعيد, كبير, صغير, شاب من سنه, راجل بتاع ربنا,…. ابتلاء من عند ربنا؟ جايز
توقف عن التساؤل أو التعجب من عمر المتوفى, ولكن مع الوقت بدأ يشعر بوجود حمل على صدره, وزن كتشبيه أقرب, عبء أو طعنة, من تتابع الابتلائات وكل تفصيلة صغيرة, المهم أنه يشعر بوجود حمل غريب لا يريد أن يعطيه اهتمام لا يستحقه, نفسياً؟ جايز.
وصل المدافن, مدافن المنارة وبدخولهم ابتدى الوزن يتحول لطعنة, لبست متكررة, بدأ الألم يتحول فى صورة كأنه يحمل طفل ثقيل, معلق فى رقبته واضعاً ركبتيه على صدره, لكن أثر ركبتيه يغرس أكتر فصدره مع الوقت.

أنا ليه يغمى على فالمدافن؟ أنا معرفش حد والواد أصلاً مش هيبقى فايقلى
بدأ يرى نفس مشهد الألوان المرتعشة مرة أخرى ولكنه مستمتع به هذه المرة حتى أنه تخيل المشهد وهو يسمع عبقرية إبراهيم معلوف, بيروت
 https://soundcloud.com/guszti/ibrahim-maalouf-beirut

قشطة يعنى, كدة كدة أنا مش هموت دلوقتى, أنا لسة موصلتش رسالتى أو حتى مش هى دى النهاية المنطقية المتطابقة لأحداث حياتى, فين العبرة حتى؟! _  ظلام

https://soundcloud.com/mydraft/ql67cnasyris

استيقظ, يحاول أن يستفيق من صورة ضبابية...… يا حبيبى, يااااااااااااااااه حبيبى
*تصفيق*
يا حبيبى
*تصفيق*
الليل وسماه ونجومه وسهـ…

• أنا حى, جميل, أنا فين؟
• طلعنا من هنا حالاً

صوت غريب, يميل إلى أنه يكون أنثوى

• حمدلله بالسلامة يابنى

لولا إنه مكنش شيخ ولابس أبيض فأبيض وراكب حصـ…. المهم كل كليشيهات الميتين متحققتش, أيوة أنا حى يبدو إنه صاحب البيت ده.

• أنا لازم امشى
• اسف, محدش فيكوا هيمشى
• فينا؟
• إنت واللى معاك
• معايا؟ إنت كفيف يا حج
• اتأدب يا ولد! أنا عارف مين وكام فبيتى دلوقتى
• سلامو عليكو يا حج
• لو طلعت بيها فوسط المقابر دلوقتى اعتبر نفسك ميت
• مقابر؟ هو البيت ده جوة المدافن؟  لو محتاج فلوس مفيش مشكلة هديـ...
• إنت معكش غير فلوس مواصلاتك فالمحفظة, أنا اسف كنت بدور على أى معلومات تدل على هويتك, متقلقش لو كنت عايز أذية كنت أذيتك وإنت نايم
• مش فاهم, إنت عايز إيه دلوقتى؟
• طلعنا من هنا حالاً. نفس الصوت الأنثوى الذى سمعه أول مرة ولكن يبدو أن العجوز قد لاحظ نفس الصوت الذى ظنه فالبداية هلاوس.

يهم العجوز بضرب يونس بعصاته على رأسه ولكن قبل أن تصل عصاته, ظلام

"….وفى أسوء الظروف الخيالية لو كان فى حاجة وليعاذ بالله فإنت راجل البيت.. إنت اللى هتحميها"

يتبع